عزيزي القارئ اسمح لي ان اقدم لك نفسي .. أنا أعوذ من كلمة أنا..
إسمي : حنظلة,إسم أبي مش ضروري, أمي .. اسمها نكبة واختي الصغيرة فاطمة ..
نمرة رجلي : ما بعرف عشان دايماً حافي ..
تاريخ الولادة : ولدت في (5 حزيران 1967)
جنسيتي : انا مش فلسطيني مش اردني مش كويتي مش لبناني مش مصري مش حدا .. الخ,
باختصار معيش هوية ولا ناوي اتجنس .. محسوبك انسان عربي وبس ..
نبذة عن حياتي ..
التقيت بالصدفة بالرسام ناجي العلي .. كاره فنه لأنه مش عارف يرسم ..
وشرحلي السبب .. وكيف كل ما رسم عن بلد .. السفارة بتحتج.. الارشاد والأنباء
(الرقابة) بتنذر ..
قلي الناس كلهم اوادم .. صاروا ملايكة .. وآل ما في احسن من هيك .. وبهالحالة.. بدي
ارسم بدي اعيش .. وناوي يشوف شغلة غير هالشغلة ..
قلتله انت شخص جبان وبتهرب من المعركة .. وقسيت عليى بالكلام, وبعدما طيبت
خاطرو .. وعرفتو على نفسي واني انسان عربي واعي بعرف كل اللغات وبحكي في كل
اللهجات معاشر كل الناس المليح والعاطل ..
وقلتله اني مستعد ارسم عنه الكاريكاتير.
كل يوم وفهمته اني ما بخاف من حدا غير الله واللي بدو يزعل يروح يبلط البحر ..
وقلتلو عن اللي بيفكروا بالكنديشن والسيارة وشو يطبخوا اكتر من ما بفكروا بــــفـــلـــســـطـــيـــن
ويا عزيزي القارئ .. انا أسف لأني طولت عليك .. وما تظن اني قلتلك هالشي عشان أعبي
هالمساحة .. واني بالأصالة عن نفسي وبالنيابة عن صديقي الرسام اشكرك على طول ..
وبس ..
التوقيع (حنظلة)